Saturday, August 19, 2017

மனிதன் மரியாதைக்குரியவன்!



-முனைவர் மௌலவி நூ. அப்துல் ஹாதி பாகவி பிஎச்.டி.

ஏழை-பணக்காரர் எனப் பொருளாதாரத்தில் ஏற்றத்தாழ்வு இருந்தாலும், கருப்பு-வெள்ளை என உடலின் நிறத்தில் வேறுபாடு இருந்தாலும், ஆண்-பெண் எனப் பாலின வேறுபாடு இருந்தாலும் மனிதன் மரியாதைக்குரியவன். ஒருவருக்கொருவரின் மதிப்பு, மரியாதையில் கூடுதல் குறைவு இருந்தாலும் ஒவ்வொரு மனிதருக்கும் தனிப்பட்ட மரியாதை உண்டு. இதுவே இஸ்லாமிய மார்க்கம் வகுத்துள்ள மனிதச் சமத்துவம்; மனித உரிமை.

மனிதனை அவமதிப்பதோ, கேவலப்படுத்துவதோ, அசிங்கப்படுத்துவதோ, மானபங்கப்படுத்துவதோ ஒருபோதும் கூடாது. சுருக்கமாக, யாருடைய மனதும் புண்படுமாறு நடந்துகொள்ளக்கூடாது. ஒவ்வொருவரையும் மதிக்க வேண்டும். ஏனென்றால் மனிதன் மரியாதைக்குரியவன்.

அல்லாஹ் கூறுகின்றான்: நிச்சயமாக ஆதமின் மக்களை (மனிதர்களை) நாம் கண்ணியப்படுத்தியுள்ளோம். அவர்களைத் தரையிலும் கடலிலும் (வாகனங்கள் மூலம்) நாமே சுமந்து செல்(லும்படிச் செய்)கிறோம். நல்ல உணவுகளையும் நாமே அவர்களுக்கு அüக்கிறோம். மேலும் நாம் படைத்துள்ள பெரும்பாலானவற்றைவிட அவர்களுக்குக் கூடுதல் சிறப்புகளை வழங்கியுள்ளோம். (17: 70)

இவ்வசனத்தில் "நாம் படைத்துள்ள பெரும்பாலானவற்றைவிட அவர்களுக்குக் கூடுதல் சிறப்புகளை வழங்கியுள்ளோம்'' எனும் அல்லாஹ்வின் கூற்று கவனிக்கத்தக்கது. இவ்வுலகில் படைக்கப்பட்டுள்ள கோடானு கோடிப் படைப்புகளைவிட மனிதனே உயர்வானவன்; மரியாதைக்குரியவன் என்பது நமக்குப் புலப்படுகிறது.

வானவர்கள், "இறைவா! ஆதமின் மக்களுக்கு (மனிதர்களுக்கு) உலகத்தை வழங்கியுள்ளாய். அதில் அவர்கள் உண்ணவும் பருகவும் (ஆடைகளை) அணியவும் செய்கின்றார்கள். ஆனால் நாங்கள் உன்னைப் புகழ்ந்து துதித்துக்கொண்டிருக்கிறோம். நாங்கள் உண்பதோ பருகுவதோ வீண் விளையாட்டுகளில் ஈடுபடுவதோ இல்லை. எனவே உலகத்தை அவர்களுக்குரியதாக நீ ஆக்கியதைப் போன்று மறுமையை எங்களுக்குரியதாக ஆக்குவாயாக'' என்று கூறினார்கள்.

அதற்கு அல்லாஹ், "நான் என் கையால் படைத்த ஒருவரின் (ஆதமின்) வழிவந்தவர்களில் நல்லவர்களை, "ஆகு' என்றவுடன் உண்டாகிவிட்ட (வான)வர்களைப் போன்று ஆக்க மாட்டேன்'' என்று கூறினான். (நூல்: தப்ரானீ)

இவ்விடத்தில் "நான் என் கையால் படைத்த ஒருவரின் வழிவந்தவர்களில் நல்லவர்களை'' எனும் வாக்கியம் மிகுந்த கவனத்திற்குரியது. வானவர்களை அல்லாஹ் ஒளியால் படைத்தான். ஆனால் "ஆகு' எனும் சொல்லால் அவர்களைப் படைத்தான். அதேநேரத்தில் மனிதனை அவன் தன் கையால் படைத்தான். ஆகவே அவன் மிகுந்த மரியாதைக்குரியவன்; மற்றெல்லாப் படைப்பினங்களைவிடச் சிறப்பிற்குரியவன்; ஏன், வானவர்களைவிட மேலானவன்.

இதனால்தான் தன் கையால் படைத்த உயரிய படைப்பான மனிதனுக்கு வானவர்கள் அனைவரும் சிரம்பணியுமாறு கட்டளையிட்டான். வானவர்கள் அனைவரும் அல்லாஹ்வின் கட்டளைக்குப் பணிந்து முதல் மனிதரான ஆதமுக்குச் சிரம் பணிந்தனர். சிரம் பணிய மறுத்த இப்லீசைச் சபித்து விரட்டியடித்தான்.
 
மனிதன் மரியாதைக்குரியவனாக இருப்பதால் அவனுடைய மானமும் மரியாதையும் காக்கப்பட வேண்டும்; அவனுடைய மரியாதைக்குக் களங்கம் ஏற்படுத்தக்கூடாது; அவனைப் பிறர் முன்னிலையில் கேவலப்படுத்தக்கூடாது. இதனை வலியுறுத்தி நபி (ஸல்) அவர்கள் தம் இறுதி ஹஜ்ஜில் மக்கள் திரள் முன்னிலையில் ஆற்றிய உரையின் ஒரு பகுதி மிகுந்த முக்கியத்துவம் பெறுகிறது.

"உங்களது புனிதமிக்க இந்த நகரத்தில் உங்களுடைய புனித மிக்க இந்த மாதத்தில், இன்றைய நாள் எந்த அளவு புனிதமானதோ, அந்த அளவிற்கு உங்கள் உயிர்களும் உங்கள் உடைமைகளும் உங்கள் மானம் மரியாதைகளும் உங்களுக்குப் புனிதமானவையாகும்'' என்று கூறினார்கள். (நூல்: புகாரீ: 67)

புனிதமிக்க மக்கா நகர் குறித்த மதிப்பும் மரியாதையும் ஒவ்வொரு முஸ்லிமின் உள்ளத்திலும் ஆழமாகப் பதிந்துள்ளது. அதில் அமைந்துள்ள கஅபாவை முன்னோக்கியே உலக முஸ்லிம்கள் அனைவரும் ஒவ்வொரு நாளும் தொழுதுவருகின்றார்கள். அத்தகைய கஅபா எனும் இறையாலயம் அமைந்துள்ள நகரம் எந்த அளவு புனிதமானதோ அதே அளவு ஒவ்வொரு மனிதனின் மானமும்  மரியாதையும் புனிதமானது என்பதை உள்ளடக்கிக் கூறியுள்ளார்கள்.

மனிதன் உயர்வானவன். மேன்மையானவன் அவன் எந்த மனிதனுக்கும் தலைசாய்க்கத் தேவையில்லை. எந்தத் தலைவரையும் வணங்கத் தேவையில்லை. அவன் அல்லாஹ்வைத் தவிர வேறு யாருக்கும் அடிமை இல்லை என்பதைப் பின்வரும் நபிமொழி உணர்த்துகிறது.

அப்துல்லாஹ் பின் அபீஅவ்ஃபா (ரளி) அவர்கள் அறிவித்துள்ளதாவது: முஆத் (ரளி) அவர்கள் சிரியாவிலிருந்து திரும்பி வந்தபோது நபி (ஸல்) அவர்களுக்குச் சிரவணக்கம் செய்தார்கள். "முஆதே! இது என்ன (புதுப்பழக்கம்)?'' என்று வினவினார்கள். "நான் சிரியாவுக்குச் சென்றிருந்தேன். அங்கு அவர்கள் தம் பாதிரிமார்களுக்கும் தலைவர்களுக்கும் சிரவணக்கம் செய்வதைக் கண்டேன். எனவே நான் அதைத் தங்களுக்குச் செய்ய வேண்டுமென விரும்பினேன்'' என்று விடையளித்தார்கள்.

அப்போது அல்லாஹ்வின் தூதர் (ஸல்) அவர்கள், "அவ்வாறு செய்யாதீர். திண்ணமாக நான் அல்லாஹ் அல்லாதவருக்குச் சிரவணக்கம் செய்ய யாரையேனும் ஏவுவதாக இருந்தால், ஒரு பெண் தன் கணவனுக்குச் சிரவணக்கம் செய்யுமாறு நான் ஏவியிருப்பேன்...'' என்று கூறினார்கள். (நூல்: இப்னுமாஜா: 1843)

இதில் மிக முக்கியமான செய்திகள் உள்ளன. ஒரு மனிதர் சமுதாயத்தில் எவ்வளவு பெரிய ஆளாக இருந்தாலும் அவருக்குப் பிறர் குனியவோ, தலைதாழ்த்தி வணங்கவோ, அவரது காலைத் தொட்டு வணங்கவோ தேவையில்லை; அவ்வாறு செய்வது கூடாது. அதுபோலவே ஒரு பெண் தன் கணவனுக்குக் கட்டுப்பட்டு நடக்க வேண்டும் என்பது ஒருபுறமிருக்க, அவள் தன் கணவனுக்குச் சிரம் தாழ்த்த வேண்டும் என்ற எந்த நிர்ப்பந்தமும் இஸ்லாமிய மார்க்கத்தில் இல்லை. ஆணும் பெண்ணும் சமமே என்பதும் இதில் உள்ளடங்கியுள்ளது.

ஆக, எல்லாப் படைப்பினங்களையும்விட உயரிய மனிதன், மாட்டிறைச்சி சாப்பிடுவதற்காகக் கொல்லப்படலாமா? எல்லாப் படைப்பினங்களையும் மரியாதைக்குரிய மனிதனின் பயன்பாட்டிற்காகத்தான் உயர்ந்தோன் அல்லாஹ் படைத்துள்ளான். எனவே ஒவ்வொரு மனிதனும் தனக்கு அல்லாஹ் ஆகுமாக்கிய உணவுகளுள் தான் விரும்பியவற்றை உண்ண முழு உரிமை உண்டு.  அப்படியிருக்கும்போது அவன் விரும்பிய உணவை உண்ணவிடாமல் தடைசெய்யவோ அவனை அடிக்கவோ, கொலை செய்யவோ யாருக்கும் உரிமையில்லை.

இவ்வுலகில் பிறந்துள்ள அனைவரும் சமமே. நான் உயர்ந்தவன், நீ தாழ்ந்தவன் என்று கூற யாருக்கும் உரிமை இல்லை. உயர்ந்தோன் அல்லாஹ் கூறுகின்றான்:

மனிதர்களே! உங்கள் அனைவரையும் நிச்சயமாக நாம் ஒரே ஆண், ஒரே பெண்ணிலிருந்துதான் படைத்தோம். பின்னர், ஒருவர் மற்றவரை அறிந்து கொள்ளும் பொருட்டு, உங்களைக் குலங்களாகவும் கோத்திரங்களாகவும் ஆக்கினோம். (ஆதலால், உங்களுள் ஒருவர் மற்றவரைவிட மேலென்று பெருமை பாராட்டிக் கொள்வதற்கில்லை.) எனினும், உங்களுள் யார் இறையச்சம் உடையவராக இருக்கின்றாரோ, அவர்தாம் அல்லாஹ்விடத்தில் நிச்சயமாக மிக கண்ணியமானவர். (49: 13)

இவ்வுலகிலுள்ள அனைவரும்  ஓர் ஆண்-பெண்ணிலிருந்து பிறந்த சமமதிப்புடைய மனிதர்களே ஆவர். அவர்களுள் மிகுந்த இறையச்சமுடையவரே இறைவனிடம் மிகுந்த மரியாதைக்குரியவர். எனவே இறைவனின் படைப்பிலும் மனிதப் பிறப்பிலும் ஒருவருக்கொருவர் எந்த வித்தியாசமும் எந்த ஏற்றத்தாழ்வும் இல்லை. உயர்ந்தவன், தாழ்ந்தவன் என்ற பேச்சுக்கே இடமில்லை. இதுதான் இஸ்லாமிய மார்க்கம் வகுத்துள்ள மனித உரிமைச்சட்டம் ஆகும்.

ஆகவே நாம் ஒவ்வொருவரும் பிற மனிதர்களை மதித்து அவரவர்க்குரிய மரியாதையைக் கொடுத்து மனிதநேயத்தோடு வாழ்வோம்.
=========================================




Tuesday, August 15, 2017

71 ஆம் ஆண்டு விடுதலை நாளில் தேசிய மூவண்ணக் கொடியை ஏற்றியபோது...

சென்னை, கொளத்தூரில் உள்ள பிரஸ் மீடியா அசோசியேஷன் அலுவலகத்தில் 71 ஆம் ஆண்டு விடுதலை நாளில் தேசிய மூவண்ணக் கொடியை ஏற்றியபோது...







கூட்டுக் குர்பானியா? வியாபாரமா?


-முனைவர் மௌலவி நூ. அப்துல் ஹாதி பாகவி பிஎச்.டி.

துல்ஹஜ் பத்தாம் நாள் உலகம் முழுவதும் இறைவனுக்காகப் பிராணிகளை அறுத்துப் பலியிடும் ஓர் ஒப்பற்ற வழிபாட்டை முஸ்லிம்கள் செய்துவருகின்றார்கள். தம்மால் இயன்ற பொருளாதாரத்தைச் செலவு செய்து ஆடு, மாடு, ஒட்டகம் ஆகியவற்றுள் ஏதேனும் ஒரு பிராணியை வாங்கி, அறுத்துப் பலியிட்டு, தாமும் உண்டு, ஏழைகளுக்கும் உண்ணக் கொடுத்துக் கொண்டாடப்படுகின்ற இரண்டாவது திருநாள்; பெருநாள்.

“துல்ஹஜ் மாதம் பத்தாம் நாள் அன்று ஒரு மனிதர் செய்யும் நற்செயல்களில் அல்லாஹ்வுக்கு மிகவும் விருப்பமானது இரத்தத்தை வழிந்தோடச் செய்யும் (இந்தக் குர்பானி) நற்செயலைவிட வேறெதுவுமில்லை. மறுமை நாளில் அந்தக் குர்பானிப் பிராணி தனது கொம்புகளுடனும் உரோமங்களுடனும் கால்குளம்புகளுடனும் (முழுமையாக) வரும். (குர்பானிப் பிராணியின்) அந்த இரத்தம், நிலத்தில் விழுவதற்குமுன் அல்லாஹ்வால் அங்கீகரிக்கப்பட்டுவிடுகிறது. எனவே மனநிறைவுடன் குர்பானி கொடுங்கள்” என அல்லாஹ்வின் தூதர் (ஸல்) அவர்கள் கூறினார்கள். (நூல்: திர்மிதீ: 1413)

இதன் முக்கியத்துவத்தை அறியாதோரும் இருக்கத்தான் செய்கின்றார்கள். இறைச்சி மட்டுமே இதன் நோக்கம் எனத் தவறாக எண்ணிக்கொண்டுள்ளார்கள். ‘குர்பானி ஒரு வழிபாடு’ என்பதை அவர்கள் அறியாதிருக்கின்றார்கள். “உம் இறைவனை வணங்குவீராக. (பின்னர் அவனுக்காக) அறுத்துப் பலியிடுவீராக” (108: 2) என்று உயர்ந்தோன் அல்லாஹ் கூறுவதை நினைவுகூர்வது அவசியமாகும்.

நம்முள் பலர் தத்தம் வீடுகளில் அன்றைய நாளில் ஆட்டை அறுத்துப் பலியிடுவதைக் கடமையாகக் கருதிச் செய்துவந்தாலும் இன்னும் ஒரு பெரும்தொகையினர் கூட்டுக் குர்பானி கொடுப்பதையே தமக்கு வசதியாகக் கருதுகின்றார்கள். “ஆட்டை வாங்கி, அறுத்து, அதைப் பங்கிட்டுக் கொடுப்பதற்குள் போதும் போதும் என்றாகிவிடுகிறது” என்று அலுத்துக்கொள்கின்றார்கள். “ஆட்டை அறுப்பவர் (கஸாயி) கிடைப்பதே  பெரும் திண்டாட்டமாக உள்ளது. அவர் கேட்கும் தொகையும் மிக அதிகமாக உள்ளது” என்று வேறு சிலர் அங்கலாய்த்துக்கொள்கின்றார்கள். இப்படிப் பல்வேறு சாக்குப்போக்குகள் கூறி, வசதியிருந்தும் அதிலுள்ள சில சங்கடங்களைச் சகித்துக்கொள்ள முடியாத பலர் கூட்டுக் குர்பானியைத் தேர்ந்தெடுத்துவிடுகின்றனர்.

இன்றைய அவசர உலகில், கூட்டுக் குர்பானியைப் பருவக் காலத் தொழிலாகவும் வியாபாரமாகவும் கருதியே பலரும் இதில் ஈடுபடுகின்றனர். “இது ஒரு வழிபாடு” என்பதை மறந்து செயல்படுகின்றனர். எழுபது பேர் பங்கு சேர்ந்திருந்தால் பத்து மாடுகளை அறுக்க வேண்டும். ஆனால் பங்குதாரர்கள் பலர் மாட்டிறைச்சி உண்ணும் பழக்கமில்லாததால், “எங்களுக்கு இறைச்சி வேண்டாம். நீங்களே பங்கிட்டுக் கொடுத்துவிடுங்கள்” என்று எல்லாப் பொறுப்பையும் அவர்கள்மீதே சாட்டிவிட்டு, இவர்கள் தம் கடமை முடிந்தது என்று ஒதுங்கிக்கொள்கின்றார்கள்.  இதனால் பத்து மாடுகளை அறுப்பதற்குப் பதிலாக ஐந்து அல்லது ஏழு மாடுகளை அறுத்து, இறைச்சியைக் கேட்போருக்கு மட்டும் பகிர்ந்துவிட்டு, அப்படியே முடித்துக் கொள்கின்றார்கள்.

உண்மையில் கூட்டுக் குர்பானி என்பது, அருகருகே உள்ள ஏழு பேர் ஒன்றாகச் சேர்ந்து, ஒரு மாட்டை வாங்கி,  ஓரிடத்தில் வைத்து, அவர்களுள் ஒருவர் அதனை அறுத்து, அதன்பின் அந்த ஏழுபேரும் அதன் இறைச்சியைச் சமமாகப் பங்கு வைத்துக்கொள்வதுதான். இது நபி (ஸல்) அவர்களின் காலத்தில் இருந்த கூட்டுக் குர்பானி முறை ஆகும். இவ்வாறு ஏழு ஏழு பேராகக் கூட்டாகச் சேர்ந்து நிறைவேற்ற வேண்டிய வழிபாட்டை, சிலர் தாமே முன்னின்று செய்வதாகப் பங்குதாரர்களிடம் பணத்தைப் பெற்றுக்கொண்டு அறுக்க வேண்டிய அளவிற்கு மாடுகளை அறுக்காமல், பங்குதாரர்களின் வழிபாட்டை முடக்கிவிடுகின்றார்கள்.

ஆகவே கூட்டுக் குர்பானியில் பங்கு சேர்பவர்கள் இதில் கூடுதல் கவனம் செலுத்த வேண்டும். “மாட்டை அறுக்கும்போது நாங்களும் அங்கு வந்து நிற்போம்” என்ற தகவலை அவர்களிடம் தெரிவித்துவிட வேண்டும்.    பங்குதாரர் இறைச்சியைச் சாப்பிடாவிட்டாலும், அதை அவர்களிடமிருந்து வாங்கி ஏழைகளுக்கு நேரடியாக அவர்களே வழங்க வேண்டும். அப்போதுதான் இது முறையாக நடைபெறும். அல்லது சிரமம் பாராமல், ஒவ்வொருவரும் தமக்குரிய ஓர் ஆட்டை வாங்கி, தம் கையால் அதை அறுத்துப் பலியிட்டு, குர்பானி வழிபாட்டை முழுமையாக நிறைவேற்ற முன்வர வேண்டும்.

தனியாக ஓர் ஆட்டையோ மாட்டையோ வாங்க இயலாதோருக்குத்தான் கூட்டுக் குர்பானி. தனியாக ஓர் ஆட்டையோ மாட்டையோ வாங்க முடியும் என்ற சூழ்நிலையில் உள்ளோர் சுயமாகவே இந்த வழிபாட்டைத் தத்தம் இல்லங்களில் நிறைவேற்ற வேண்டும்; கூட்டுக் குர்பானியில் சேரக் கூடாது.

மற்றொரு புறம், கறிக்கடை வைத்து நடத்துபவர்களும் கூட்டுக் குர்பானிக்காகப் பங்குதாரர்களைச் சேர்க்கின்றார்கள். அவர்கள் அத்தொழிலையே ஆண்டுமுழுவதும் செய்துவருவதால், வியாபார நுணுக்கத்தோடு இதில் பெருவாரியான இலாபத்தை ஈட்டிக்கொள்கின்றார்கள். பங்குதாரர்களிடம் மிகுதியான பணத்தைப் பெற்றுக்கொண்டு, விலை குறைவான மாட்டை அறுத்து, குர்பானியை முடித்துவிடுகின்றார்கள். அவர்கள் மாட்டை அறுக்கும்போது பங்குதாரர்கள் அங்கு நிற்பதோ பார்ப்பதோ கிடையாது. பெரும்பாலோர் மாட்டிறைச்சி என்பதால் குர்பானி இறைச்சியை வாங்குவதும் கிடையாது. இவையெல்லாம் அவர்களுக்கு வசதியாகப் போய்விடுகின்றன. ஆக, ஒரு வழிபாடு எப்படியெல்லாம் திசைமாறிச் செல்கிறது என்பதைக் கண்டு மனம் வெதும்பாமல் இருக்க முடியவில்லை.

மற்றொரு சாரார் கூட்டுக் குர்பானியை நாடுவதன் காரணம், அவர்களுக்குப் பலிப்பிராணிகளை அறுத்துப் பலியிடத் தேவையான இடவசதி இல்லாததே ஆகும். பெருநகரங்களில் மிகுதியானோர் தொகுப்பு வீடுகளில்  (அபார்ட்மெண்ட்) வசித்து வருகின்றனர். அவர்களிடம் போதுமான பொருளாதார வசதி இருந்தும், ஆட்டை வாங்கி அறுத்துப் பலியிடத் தேவையான இடவசதி இல்லை. அக்கம் பக்கம் வசிப்போர் பிறமதச் சகோதரர்களாக இருப்பதால் அவர்களின் நலம் நாட வேண்டியுள்ளது. இதனால் இத்தகையோர் தம் இக்கட்டான சூழ்நிலையைக் கருத்தில்கொண்டு, இவர்கள் அனைவரும் கூட்டுக் குர்பானியை நாடுகின்றனர். ஆகவே  இவர்கள் தம் குர்பானி வழிபாட்டைச் செவ்வனே நிறைவேற்றிக்கொள்ள இடவசதி செய்து கொடுக்க வேண்டும்.

பள்ளிவாசலைச் சுற்றிக் காலி இடம் இருந்தால் அதைக் குர்பானி வழிபாட்டிற்காகப் பயன்படுத்திக்கொள்ள அந்தந்தப் பள்ளி நிர்வாகிகள் அனுமதியளிக்க வேண்டும்; அதனைத் தம் மஹல்லா மக்களுக்குப் பொது அறிவிப்புச் செய்ய வேண்டும். அல்லது வேறு காலியிடங்கள் இருந்தால் அங்கு அந்த மஹல்லா நிர்வாகமே அதற்கான ஏற்பாட்டைச் செய்து கொடுக்க வேண்டும். இதனால் முஸ்லிம்கள் பலர் குர்பானி எனும் வழிபாட்டைத் திருப்தியோடு செய்ய வாய்ப்புக் கிடைக்கும்.

ஆக நாம் அனைவரும் மாசற்ற மனதோடு, இந்தக் குர்பானி வழிபாட்டை மனதார நிறைவேற்ற உயர்ந்தோன் அல்லாஹ் நம் அனைவருக்கும் நல்வாய்ப்பை நல்குவானாக. நாம் அறுத்துப் பலியிடுகின்ற உயிர்ப்பிராணியை நாளை மறுமையில் சிராத்துல் முஸ்த்தக்கீம் பாலத்தை மின்னல் வேகத்தில் கடந்து செல்லும் வாகனமாக நமக்கு ஆக்கித் தருவானாக.

=========================================================





முனைவர் பட்டம் பெற்ற ஐந்து ஆலிம்கள்!


சென்னைப் பல்கலைக்கழகத்தின் நூற்றாண்டு கட்டட மண்டபத்தில் 15. 07. 2017 அன்று 159ஆவது பட்டமளிப்பு விழா பல்கலைக்கழக வேந்தரும், தமிழக பொறுப்பு ஆளுநருமான வித்யாசாகர் ராவ் தலைமையில் நடைபெற்றது. அதில் பல்கலைக்கழக இணைவேந்தரும் உயர்கல்வித்துறை அமைச்சருமான கே.பி. அன்பழகன், பல்கலைக்கழகத்தின் துணை வேந்தர் பி. துரைசாமி, உள்ளிட்ட பலர் பங்கேற்றனர். மாணவர்களுக்கு ஆளுநர் வித்யாசாகர் ராவ் பட்டங்களை வழங்கினார்.  மொத்தம் 13 ஆயிரத்து 780 பேர் பட்டம் பெறும் நிலையில் இந்த நிகழ்வில் 1,216 பேர் பட்டம் பெற்றனர். சில நூறு பேருக்கு ஆளுநர் வித்யாசாகர் ராவ் பட்டங்களை வழங்கிய பின், மற்ற மாணவர்கள் அனைவருக்கும் பல்கலைக்கழகத்தின் துணை வேந்தர் துரைசாமி பட்டங்களை வழங்கினார். பல்வேறு துறைகளில் முனைவர் பட்டம் பெற்ற 1,216  மாணவர்களுள் ஐவர் ஆலிம்கள் என்பது குறிப்பிடத்தக்கது. 
 
இனிய திசைகள் துணை ஆசிரியராகவும் மணலியில் உள்ள மஸ்ஜித் ஜாமிஉல் அன்வார் பள்ளிவாசலில் இமாமாகவும்  பணியாற்றி வருகின்ற, மொழிபெயர்ப்பாளர் மௌலவி நூ.  அப்துல் ஹாதி பாகவி, அண்ணா நகர் அருகே உள்ள சாந்தி காலனியில் அமைந்துள்ள மஸ்ஜித் நூர்  பள்ளிவாசலில் இமாமாகவும் அரும்பாக்கம் சதக்  மெட்ரிக்குலேஷன் பள்ளியில் அரபித்துறை ஆசிரியராகவும் பணியாற்றி வருகின்ற மௌலவி அல்ஹாஃபிழ் முஹிப்புல்லாஹ் பாகவி, வண்டலூரில் அமைந்துள்ள புகாரிய்யா அரபுக் கல்லூரியில் பேராசிரியராகப் பணியாற்றுகின்ற மௌலவி அப்துஸ் ஸமது நத்வி, புதுக் கல்லூரியில் உதவிப் பேராசிரியராகப் பணியாற்றுகின்ற மௌலவி சையது ஃபஸ்லுல்லாஹ் பக்தியாரி உமரி நத்வி, இராயப்பேட்டையில் உள்ள தலைமை காஜி மஸ்ஜிதில் இமாமாகப் பணியாற்றுகின்ற மௌலவி அல்ஹாஃபிழ் சயீதுத்தீன் ஜமாலி ஆகியோர் அரபித்துறையில் முனைவர் பட்டம் பெற்றுள்ளனர். ஒரே நேரத்தில் ஆலிம்கள் ஐவர் முனைவர் பட்டம் பெற்றுள்ளதன்மூலம் சமுதாயத்தில் கல்வியின் முக்கியத்துவம் மேலோங்கி வருவதைக் காண முடிகிறது. இவர்கள் ஐவரும் இன்றைய இளம் ஆலிம்களுக்கும் இஸ்லாமியச் சமுதாயத்திற்கும் ஒரு முன்னோடியாகத் திகழ்கின்றார்கள். 
        
     -தகவல்: முனைவர் மௌலவி நூ. அப்துல்ஹாதி பாகவி

குறிப்பு: இச்செய்தியை வெளியிட்ட மணிச்சுடர் நாளிதழுக்கும் இனிய திசைகள் மாத இதழுக்கும் என்னுடைய மனமார்ந்த நன்றியைத் தெரிவித்துக்கொள்கிறேன்.     

================================


Thursday, August 10, 2017

சுனனுந் நஸாயீ (நபிமொழித் தொகுப்பு) நூல் வெளியீடு

நான் தமிழாக்கம் செய்த சுனனுந் நஸாயீ (நபிமொழித் தொகுப்பு) நூல் இன் ஷா அல்லாஹ் 12-08- 2017 அன்று மாலை கவிக்கோ மன்றத்தில் வெளியிடப்படவுள்ளது என்பதை மிக்க மகிழ்ச்சியுடன் தெரிவித்துக் கொள்கிறேன். 

வாய்ப்புள்ளோர் கலந்து கொள்ளுமாறு அன்புடன் கேட்டுக் கொள்கிறேன். 

- முனைவர் மெளலவி நூ. அப்துல் ஹாதி பாகவி