-----------------------------
அவர்களின் மறைவையொட்டி இனிய திசைகள் மாத இதழில் (பிப்ரவரி 2022) அன்று இடம்பெற்றிருந்த
கட்டுரை:
வேலூர் அல்பாக்கியாத்துஸ் ஸாலிஹாத் அரபுக் கல்லூரியின் மேனாள் பேராசிரியர்-முதல்வர்,
ஷைகுத் தஃப்ஸீர்,
பல்லாயிரக்கணக்கான ஆலிம்களின்
ஞானப் பேராசான் மௌலானா மௌலவி அல்லாமா பி.எஸ்.பி. ஜைனுல் ஆபிதீன் பாகவி 06.01.2022 அன்று சென்னையில் வஃபாத் ஆனார்.
(இன்னா லில்லாஹி வ இன்னா இலைஹி ராஜிவூன்.)
திண்டுக்கல் மாவட்டம் ஸ்ரீராமபுரம் கிராமத்தில் பாட்சா இராவுத்தர்-ஆமினா அம்மாள்
தம்பதியருக்கு 1938இல் ஏழாவது பிள்ளையாகப் பிறந்தவர் மௌலவி பி.எஸ்.பி. ஜைனுல் ஆபிதீன் பாகவி ஹள்ரத்;
அங்குள்ள சிறு பள்ளியில்
நான்காம் வகுப்பு வரை பயின்ற பின்னர் ஈராண்டுகள்
தனியாக ஓர் ஆசிரியரிடம் கல்வியும் கற்றவர். 1948இல் தஞ்சை மாவட்டம் பண்டாரவாடையில்
உள்ள பெரிய பள்ளிவாசல் அரபு மத்ரஸாவில் முதல் ஜும்ராவும், திண்டுக்கல் முஹம்மதியா புரம்
பள்ளிவாசல் மத்ரஸாவில் 2 மற்றும் 3ஆம் ஜும்ராவும் ஓதிய ஹள்ரத் அவர்கள் லால்பேட்டை ஜாமிஆ மன்பவுல் அன்வார் அரபுக்
கல்லூரியில் 4 மாதங்களே 4ஆம் ஜும்ராவை ஓதியவராவார். தந்தையின் மறைவால் ஊர் திரும்ப வேண்டிய சூழல் அப்போது
அவருக்கு உருவானது.
அதன்பின்னர் நெல்லை பேட்டை ரியாளுல் ஜினான் அரபுக் கல்லூரியில் மீண்டும் 4ஆம் ஜும்ராவில் சேர்ந்து ஆறாம்
ஜும்ரா வரை ஓதிய அவர், 1956இல் வேலூர் அல்பாக்கியாத்துஸ் ஸாலிஹாத் அரபுக் கல்லூரியில் மீண்டும் ஆறாம் ஜும்ராவில்
சேர்ந்து ஏழாம் ஜும்ராவும் முடித்து 1958இல் பாகவி ஸனது பெற்றார். பல்லாண்டுகள் அக்கல்லூரியிலேயே பேராசிரியராகவும்,
முதல்வராகவும் விளங்கிய
ஹள்ரத் அவர்கள் பின்னர் சென்னையில் மஜ்லிஸுல்
அப்ரார் மத்ரஸாவில் எண்ணற்ற மாணவர்களுக்குக் கற்பித்தும் வந்தார்.
பி.எஸ்.பி. ஹள்ரத் அவர்கள் பேச்சுக்கலை, எழுத்துக் கலை, மொழிபெயர்ப்புக் கலை எனும் முக்கலையிலும்
முத்தாய்ப்பாக இலங்கியவர்; தமிழ், அரபி, ஃபார்ஸி, உர்தூ நான்கு மொழிகளிலும் மிகப்பெரும் விற்பன்னராகத் திகழ்ந்தவர். ஃபார்ஸி மொழிக்
கவிதைகளில் தணியாப் பேரார்வம் கொண்டிலங்கியவர்; வேலூர் ஜாமிஆ அல்பாக்கியாத்துஸ்
ஸாலிஹாத் வெளியிட்ட தஃப்ஸீர் ஜவாஹிருல் குர்ஆன் - திருக்குர்ஆன் விளக்கவுரை நூல்களில்
பல பாகங்களில் ஹள்ரத் அவர்கள் ஆற்றியுள்ள அரும்பணி மிகவும் சிறப்புக்குரியதாகும்.
உத்துலுபுல் இல்ம வ லவ் பிஸ்ஸீன் என்ற நம் பெருமானார் -ஸல்லல்லாஹு அலைஹி வஸல்லம்-அவர்களது
அமுத மொழிக்கு, "சீனதேசம் சென்றாகிலும் சீர்கல்வியைக் கற்றுக்கொள்' என்றே புரிதல் இருக்கிறது.
"நான் அறிவின் பட்டணம்; அலீ அறிவின் தலைவாயில்' என்றுரைத்த அண்ணலார் -ஸல்லல்லாஹு
அலைஹி வஸல்லம்-அவர்கள் உரைத்திருப்பதைப் பார்க்கும்போது அண்ணலார் அவர்களே அறிவின்
பட்டணமாக இருக்கும்போது -அதிலும் அன்றைய சீனா அறிவின்மையின் மொத்த உருவமாக இருந்தபோது-
அவர்கள் சீனதேசம் சென்று கற்றுக்கொள்ளச் சொல்லியிருக்க முடியுமா என்ற எண்ணம் எழுகிறதென
ஓர் ஆலிம் பி.எஸ்.பி. ஹள்ரத் அவர்களிடம் கேட்டபோது அவர்கள் சொன்ன விளக்கம் புல்லரிக்க
வைக்கக்கூடியது.
"உத்துலுபுல் இல்ம வ லவ் பிஸ்ஸீன்' என்ற வரி "உத்துலுபுல் இல்ம வ லவ் குன்த்த பிஸ்ஸீன் என
அமைந்ததாகும். "குன்த்த' எனும் வார்த்தை ஃகாயிப்-மறைமுகமாக அங்கே இருக்கிறது. "குன்த்த' எனும் வார்த்தை மறைமுகமாக வருமிடங்களையும்
எடுத்துக் காட்டி "உத்துலுபுல் இல்ம வ லவ் (குன்த்த) பிஸ்ஸீன்' - அதாவது "நீ சீனாவில் இருந்தாலும்
இங்கே (மதீனா) வந்து கற்றுக்கொள்' என்றே அமைகிறதென ஹள்ரத் அவர்கள் விளக்கமளித்தமை குறிப்பிடத்தக்கதாகும். இதுபோன்று
எண்ணற்ற கருத்துகளை விளக்கிய மிகப்பெரிய மேதையாக இலங்கியவர் பி.எஸ்.பி. அவர்கள்.
ஞானக்களஞ்சியமாகத் திகழ்ந்த பிஎஸ்பி ஹள்ரத் அவர்கள் "அண்ணல் அஃலா ஹள்ரத் அடக்கம்
செய்யப்பட்டிருக்கிற இடத்திற்கு அருகில் நானும் அடக்கம் செய்யப்பட வேண்டுமென துஆ செய்து
வருகிறேன்'' என்று சொன்னதை வல்ல அல்லாஹ் ஏற்றுக்கொண்டுவிட்டான். வேலூர் அல்பாக்கியாத்துஸ்
ஸாலிஹாத் அரபுக் கல்லூரிக்கருகில் சின்ன பள்ளிவாசல்
மையவாடியில் தம்முடன் ஒன்றாக ஃபாஜில் வகுப்பில் பயின்ற தம் தோழர் அல்லாமா ஞானப்பெருந்தகை
ஷப்பீர் அலீ ஹள்ரத் அடக்கவிடத்திற்குப் பக்கத்திலேயே பிஎஸ்பி ஹள்ரத் அவர்களும் அடக்கம்
பெற்றுள்ளார் என்பது எண்ணிப் பார்க்கப் பிரமிப்பைத் தந்து அவர்கள்தம் இறைநேசத் தன்மையையும்
உணர வைக்கிறது.
-ஆசிரியர் சேமுமு
============================================0
உயர்ந்தோன் அல்லாஹ் ஹள்ரத் அவர்களின் மண்ணறையைச் சுவனத்தென்றல் வீசுமிடமாக
ஆக்குவானாக. இவர்களோடு ஏனைய ஆசிரியர்களின் மண்ணறைகளையும் ஒளிமயமாக ஆக்குவானாக.
என்றும் நீங்கா நினைவுகளுடன்...
நூ. அப்துல் ஹாதி பாகவி
06 01 2025
